طريق جديد!

 

باسمك اللهم نخوض دروباً جديدة آملين أن لا نتعثر

أهلاً أصدقاء مدونتي الأعزاء ❤️

أتمنى تكونون في أفضل حال ( ما عاد بكتب ديباجة العودة راح اختفي واظهر بصمت ههههه )

بـ ٢٠١٩ قررت أحقق الشيء اللي كنت أحبه وأتمنى اسويه من زمان واللي هو “الترجمة” ما كان موجود فرع الترجمة بجامعتي لذلك ما درست إلا كورسين فقط وما أحس إنها اشبعت الشغف اللي كان فيني ودايماً اقول ابغى أبدأ بس ما كنت اسوي شيء حرفياً، واعتقد كلنا عندنا خطط وأمنيات ودنا نحققها بس مؤجلة لأجل غير معلوم ولأسباب احنا مختلقينها بس عشان مالنا خلق أو نخاف نفشل فيها، كنت مستمرة بتأجيلي لحد ما قرأت مرة إنه لما تبدأ بشيء تعتبر انهيته وقررت أبدأ هالمشوار!

قد جربت تتعلم اللغة من خلال الأفلام؟

مساء الخير أصدقائي! 

قد جربتوا تتعلمون اللغة من خلال الأفلام؟ أو تعرفون أحد تعلم من خلالها؟ 

كثير ناس كانت ميح وصارت بيرفكت بسبب إدمانهم على الأفلام. اذكر كان مستواي أنا وصديقتي بالمتوسط مرة زين، أنا كنت كويسه لأني اتعلم ذاتياً وهي كانت كويسه لأنها كانت مدمنه أفلام وأغاني، تسمع كثير وتكتب الكلمات ب نوت وتحفظها. 

نصائح مهمة قبل تعلم اللغة الإنجليزية .

‎السلام عليكم ورحمة الله وبركاته

‎ما يخفى عن الجميع أهمية اللغة الإنجليزية وكيف صارت لغة التخاطب العالمي  بالإضافة إلى إن كثير من الدول اعتمدوا اللغة الإنجليزية كلغة علمية في الجامعات والخ، لذلك أشوف إنها ضرورة لابُد من تعلمها . 

‎: وعشان تتعلمين اللغة الإنجليزية أو أي لغة بالعالم لازم تاخذين هالنصائح بعين الإعتبار

‎العزيمة : ضروري يكون عندك عزيمة وإصرار لأن ما راح تتعلمين اللغة إذا ما كان عندك إنطلاقة قوية تعاهدين نفسك فيها, ولا تتخيلين إنك بتتعلمين اللغة بغمضة عين لأ المسألة محتاجة تعب وجهد منك. 

‎طريقة التعلم : كل شخص له طريقة مختلفة يحب يتعلم فيها، فيه أشخاص يفضلون التعلم بالتكرار وفيه أشخاص يفضلون التعلم بالكتابة، بينما فيه أشخاص يفضلون التعلم بالإستماع لـ native-speakers يعني المتكلمين الأصليين للغة.

‎كمان تحديد نمط التعلم مهم جدًا، اللي هو مدى استيعابك للمعلومات يكون معتمد على نوع من هالأنواع: سمعي , بصري, حركي

‎مثلاً المتعلم البصري يعتمد بتعلمه للمعلومات على إنه يشوفها قدامه بدل من إنه يسمعها ويحب يحفظ المعلومات على شكل صور أو رسوم بيانية أو خرائط ذهنية, ولو تتقدم له المعلومة بشكل لفظي بيقول ابغى شوفها مكتوبة عشان استوعبها وأنا من هالفئة ما اقدر افهم شرح الأستاذات إلا لما اتابع معهم بالكتاب واشوفها مكتوبة قدامي. أما المتعلم السمعي يحب يسمع للآخرين وهالفئة تفضل حضور الندوات والحلقات، يفضلون الكتب السمعية أكثر من المقروءة، عندهم قدرة على حفظ كم هائل من المعلومات بمجرد ما يسمعونها فقط. المتعلم الحركي يتميز هالمتعلم بإنه يستوعب ويتعلم عن طريق العمل أو الحركة وأغلب المتعلمين من هذي الفئة نلاقيهم في الشغل اللي يتطلب مهارة يدوية مثل النجارة والبناء والخ
‎. موجود بـ قوقل اختبارات كثير تبين لك أنت من أي نمط #

 الوقت :  جدًا مهم اختيار الوقت المناسب، خصصي لك وقت تكوني فيه رايقه وما عندك شغل واعتمديه كـ روتين واستمري عليه

 

الـnotebook : اشتري لك دفتر وخليه كـ يوميات لتعلم اللغة، سوي لك فيه لِيست بـ الكلمات الشائعة في الإنجليزي واكتبي مقابلها طريقة نطقها أو نوع الكلمة هل هي اسم أو صفة أو غيره وراجعيها كل يوم، جربت هالطريقة قبل ادرس الإنجليزي بالإبتدائي كانت وظيفتي بالحياة اشتري دفاتر واجلس مع الخدامات يعلموني كلمات انجليزية احفظها 😂.. جربي بعد تحددين لك مجموعة كلمات خنقول 10 كلمات كل يوم تكونين لكل كلمة جملة وتحفظينها ذا الطريقة فعالة جدًا لأن حفظ الكلمة لوحدها ما يكفي بتنسين بس لو حطيتيها بجملة أو ربطيتها بصورة ما راح تنسينها .

 ممارسة اللغة : إذا ما تمارسين اللغة راح تنسين كل شيء تعلمتيه، لا تترددين بالكلام استخدمي اللغة حتى لو غلطتي عادي بدون الغلط إحنا ما نتعلم .. تذكري دائمـًا إنو: ب 

* Perfection will come with practice ✔️ *

يعني الإتقان سوف يأتي مع الممارسة

 التركيز على تطوير المهارات الأربعة : اللغة الإنجليزية تعتمد على 4 مهارات مهمة اللي هي : الاستماع ، الكتابة ، القراءة ، التحدث .

 مهارة الاستماع : اسمعي كثييييييييييير سواء كان دروس اللغة الصوتية أو ابحثي عن الكتب الصوتية بأي مجال تحبينه شغليها وانت بالانتظار أو وانت رايحه للدوام، شوفي موفيز كثير وأفضّل إنها تكون بدون ترجمة + تكونين شايفتها من قبل عشان ماا تلهين مع الأحداث وتنسين طريقة نطقهم للكلام  

 مهارة القراءة : ابدئي بقراءة الكتب البسيطة بعدين تدرجي من السهل للصعب وحاولي تقرئين بدون ديكشنري وتخمنين المعنى مع الوقت بتصيرين تلقطين المعنى من السياق بدون ما تترجمين كلمة كلمة، اقترح تبدئين بقصص الأطفال لأن عادة أسلوبها يكون سهل وبسيط، أو اقرئي كتب ومجلات بمجال إنت تحبين تقرئين فيه بالعربي هالشيء بيسـاعدك في مواصلة القراءة بدون ملل لأنك مستمتعة. تعلمي من الديكشنري ( القاموس ) اقرئي الكلمات الجديدة حطي عليها هايلايت حاولي تكتبينها كثير عشان تحفظين السبيلنق تبعها أو استخدميها بجمل أو سؤال وجواب، أفضّل الديكشنري المصور أحسه مفيد أكثر لأن لما تحفظين الكلمة وتربطينها بصورة ما راح تنسينها 

  عندي كتاب رهيب، نظامه كل كلمة ومعناها بالعربي وبالصور وشامل لكل شيء شريته من جرير #

اسمه Oxford picture dictionary وهذي صورته .

  
‎مهارة التحدث :  موجود تطبيقات كثيرة تساعدك في التواصل مع متحدثين اللغة الأصليين لأن لازم تتكلمين وتستخدمين اللي تعلمتيه، أو جربي تتكلمين مع أي شخص يعرف أو قاعد يتعلم اللغة .
 
‎#موجود ابليكشن على الآيفون اسمه
( Hello Talk ) حـلو ومفيد مرة، تدخلين لغتك الأصلية واللغة اللي جالسه تتعلمينها يطلع لك كل الناس اللي يتكلمونها وتقدرين تكونين لك صداقات وتسولفين معاهم كتابة، فويس مسج، فيديو وهذي صورته. 

 
‎أخيرًا إن شاء الله أكون أفدتكم ولو بحاجة بسيطة 💗🌿
‎لو عندكم أي سؤال الأسك حقي موجود بالشريط اللي فوق اكتبوا لي فيه.   
 

 

أول تدوينة .

السلام عليكم ورحمة الله وبركاته

 على بركة الله استفتح أول تدوينه بكل حماس وحُـب وشغف 💗

عادةً لما يستصعب علي فهم بعض المواد أو ما قدرت افهم على الدكتورة ألجأ للشروحات والدروس الموجودة عـلى المواقع أو اليوتيوب وما تخيب ظني ، أخرج منها دائماً وأنا كلي إمتنان لصاحب المعلومة كيف إنه قدم معلومة بسيطة بس بالنسبة لي فكت أزمة! 😪

أقدّر جدًا مبدأ مساعدة الآخرين لأنه شعور جميل لما تكون سبب في نجاح أي شخص بعد الله طبعاً ، وما تبغى من هذا كُله إلا دعوة صادقة يسعدك الله بها.

قرأت مرة كلام جميل عن هالشيء: ”عليكم بالتدوين ونشر الفائدة بطريقتكم، لا تتكاسلوا عن كتابة كل شيء فيه نفع للغير.. معنى أن يكون العالم كافٍ لي ولك وله؛ أن نعلَم ونُعلِّم وننشر ما نعرفه وما نحبه وما نجمّل به الأرض، معًا”

لذلك راح يكون هذا المكان مخصص لكل شيء يتعلق باللغة الإنجليزية من دروس ونصائح وغيره، طبعاً يستحيل إني أكون عالمة وملمة بكل شيء بس اللي مو مستحيل إن الواحد يعلم ويتعلم عادي! أنا هنا بأقدم لكم كل المعرفة اللي عندي بدون أي قيود.

لا تنسون لو حبيتوا فكرة المدونة شاركوها مع اللي تحبون لأن هالشيء بيسعدني مرّة 💗.

ولو عندكم إقتراحات أو أسئلة اكتبوا لي تحت بالكومنت .