أدوات التعريف والتنكير Articles

أهلاً أصدقائي!

كيف الحال؟

آخر تدوينة كانت قبل ٧ شهور اتوقع، يا ساتر وش ذا القطعه! 🤦🏻‍♀️

ما علينا ذي أول تدوينة بعد التخرج الحمدلله وبإذن الله ارجع أدون وما أطول عليكم كثير + ممنونة لكل التفاعل اللي صار بالفترة الأخيرة ♥️.

سبق وذكرت بتدوينة “أقسام الكلام” أدوات التنكير والتعريف ولكن بشكل مختصر جداً، فاليوم راح اشرحها بالتفصيل.

تنقسم الأدوات لقسمين:

١– غير محددة | indefinite | إندِيفينت :

وتشمل الأداتين a / an

٢– محددة | definite | ديفينت :

وتشمل the

النوع الأول

a – an / هي أداتين نستخدمها قبل الاسم عشان نخليه نكره أو غير معروف وغير محدد، لهم نفس المعنى ولكن فيه فرق بسيط بينهم.

( an )

 تجي قبل كل اسم يبدأ بحرف من الحروف المتحركة أو ما نسميها ب حروف العلة، ذكرتها قبل وبعيدها حروف العلة خمسة هي:

a – e – i – u – o

مثلاً:

This is an apple | ذس إز آن أبل

هذه تفاحة.

وعشان تثبت ب الرأس أكثر حاولوا تنطقون أي كلمة تبدأ بحرف علة ولكن اسبقوها ب a راح تلقون صعوبة بالنطق مثل كلمة تفاحة، ما يصير نقول أ أبل!!! لذلك استخدام an قبلها هو الأنسب.

( a )

تجي قبل كل اسم يبدأ بحرف من الحروف الساكنة والحروف الساكنة هي بقية الحروف ما عدا حروف العلة.

مثلاً:

This is a book | ذس إز أ بوك

هذا كتاب

متى تستخدمهم؟

* قبل الأسماء المفردة المعدودة.

يعني أي اسم مفرد وأقدر أعده

مثل كلمة بيض egg وكتاب book

* قبل أسماء الوظائف/ الجنسيات.

teacher | تيتشر | معلم

American | أميركان | أمريكي

قبل الأسماء اللي الحرف الأول منها نفس صوت حروف العلة أو العكس. شلون يعني؟ يعني مثل كلمة hour. هالكلمة معناها ساعة وتبدأ بحرف ساكن وحرف الـ h هنا سايلنت لا ينطق فيصير نطقها ( أور ) لاحظوا الصوت أ صارت الكلمة كأنها تبدأ بحرف علة لذلك نحط قبلها an hour. حالة ثانية عشان تستوعبون عندنا كلمة one تبدأ بحرف متحرك أو علة يعني المفروض نحط an صح؟ بس احنا ما راح نحطه ليش؟ لأن نطق الكلمة ون يعني كأن الكلمة كذا won لذلك راح نحط قبلها a one.

يارب فهمتوا هالنقطه 😢

النوع الثاني

the / هي أداة تستخدم قبل الاسم عشان نخليه معروف أو معلوم أو محدود، نفس وضع الـ التعريف عندنا فاللغة العربية.

مثلاً مدرسة هنا نكرة وغير محددة يعني أي مدرسة، بإضافة الـ عليها تصير محددة المدرسة يعني مدرسة معينة.

متى نستخدمها؟

* قبل الاسم المعدود في جميع الحالتين مفرد وجمع.

* قبل اسم مافي منه إلا شيء واحد بالعالم يعني لما اذكره يتبادر لذهنك نفس الشيء.

مثل:

The sun – الشمس

The moon – القمر

The river Nile – نهر النيل

The ka’aba – الكعبة

* قبل بعض أسماء البلدان.

مثل:

The United Kingdom 🇬🇧

* قبل اسم قاعده أذكره للمرة الثانية.

مثلاً:

I met a girl, the girl was my neighbor

يعني قابلت فتاة، الفتاة كانت جارتي.

* استخدمها لما أكون اتكلم عن شيء معين والشخص اللي قدامي عارف وش أقصد.

زي لما أقول أنا جيت من المدرسة فالشخص اللي قاعده أكلمه عارف أنا أقصد المدرسة المعينة اللي اروح لها كل يوم

* قبل اسماء المطاعم والفنادق والجرائد.

* قبل اسماء الأنهار والبحار.

فيه استخدمات بعد للأدوات لكن ذكرت الشائعة عشان ما ابغى أدخلكم بمتاهات، أتمنى إني شرحت بشكل بسيط وواضح.

ادعوا لي وشاركوها أصحابكم 🌱.

الإعلانات