Oxford Stories .

السلام عليكم ورحمة الله وبركاته
كيف الحـال؟

بما إن الإجازة طويلة جبت لكم قصص بطلة تستغلون فيها إجازتكم وكمان تساعدكم في تطوير مهارة القراءة  ♥️🌟✔️ .

قصص اكسفورد هي مجموعة قصص تعليمية مصنفة لـ ٦ مستويات + مستوى Starter يعني مستوى المبتدئ، كل مستوى يحتوي على قصص كثيرة منها الخيالية والمرعبة والغامضة وفيها بعد سير ذاتية.

بـ آخر القصة موجود فيه Glossary يشرح معاني الكلمات الصعبة. وبعد فيه اكتيڤتيز وأسئلة قبل وخلال وبعد القراءة، أشوفها مفيدة وممتعة جدًا يعني تخمنين وش بيصير فالأحداث أو تثبت الشيء اللي قريتيه.

فيها ميزة جميلة اللي هي إن كل قصة يجي معاها CD فيه القصة صوتية، تقدرين تتابعين معاه القصة أو تسمعينها أكثر من مرة حتطور مهارة الإستماع عندكم أكيد.

قصص اكسفورد تراعي التدرج مع مستويات القراء، يعني المبتدئين قصصهم تكون الصور أكثر من الكلام والجمل تكون بسيطة وكل ما تطلعين لـ مستوى يزيد الكلام وتصعب المفردات والخ.

لو حابين تعرفوا عن ايش القصة تتكلم موجود بالغلاف الخلفي للقصة سمري يعني ملخص للقصة أقرؤه.

أنا بدأت بالمستوى الرابع اخترت قصة Little women لـ Louisa Alcott أعجبتني القصة وتعلمت منها مفردات جديدة، وبرجع اشتري منها كمان ان شاء الله.

تلاقون هالقصص بـ مكتبة العبيكان أو جرير فيه رف خاص بقصص اكسفورد، أنا خذيتها قبل سنة أو أكثر بـ ٤٥ ريال يقولون الحين صارت بـ ٣٥ ريال فما ادري تأكدوا .

للناس اللي ما عندها إمكانية تشتريها جبت لكم رابط يوفر كل القصص بكل المستويات تقدروا تقرؤوا وتسمعوا منه، بس انتبهوا في هالرابط حاطين القصص من المستوى ١ يعني مستوى المبتدئ قبل الأول مش موجود .

هذا هو:
‏http://www.vb.eqla3.com/showthread.php?t=1493109

وبس إجازة ممتعة للجميع ♥️.